Kumpulan Mantra: T utur begawan Anggastyaprana

T utur begawan Anggastyaprana

Om Awignamastu nama sidyem

Iti katuturan Ida Sang Resi Begawan Anggastyaprana. Maduwe putra kekalih lanang istri, neluwuran lanang mewasta Sang Surabrata, ne alitan istri mapesengan Sri Satyakreti, Ida Bagawan Anggastyaprana sampun puput ring panugrahan, saking tapa brata, meraga Resi Bodha, mengregep wong kharaksara,

Kunang putrane lanang istri matur, “Inggih paduka Sang Resi, tabe pakulun matur, tan katiben tulah carik, raja pinulah Hyang Suksma” Sumawur Bagawan Anggastyaprana, udu anak inggsun kalih, punapi pamitakon ceninge ring Bapa, “ Inggih yan wenang paduka lugraha ring kawula, tityang nunasang satingkahe dados jadma, sapunapi witte ring kuna. Sumahur Resi Anggastyaprana, sapuniki cening kawite sampun.

“ Cening meraga Sang Hyang Siwaatma, duk Sang Bapa muah Sang Ibu sami bajang, cening ngalih tongos Sang Bapa muang Sang Ibu, pada manah kesemaran. Semaran Sang Bapa mearan Semarajaya, semaran Sang Ibu mearan Semara Ratih, cening mearan Semara Sunia, sami kasusupin manah, Sang Bapa muang Sang Ibu pada – pada kasusupin, dadi matemu karsa pada karsa, ya matemu demen pada demen, mesalin aran ia, Sang Bapa Semara lulut manah nia, Sang Ibu samara woneng manah nia, cening Semara Asih, nyusup ring I Bapa muah rig Sang Ibu, krana matemu pada suka, cening dadi Sang Hyang Suniatma. Duk matemu asanggama Sang Ibu ring Sang Bapa cening Sang Kama Mola arane nyusup ring kaman Sang Ibu muah ring Kaman Sang Bapa. Anging kamane kasilurang dumun, Ida Bhagawan dwi sareng Buyatni murti sareng nyilurang, mula kamane ring Sang Lanang, kamane putih rig Sang Wadon, keto kawite. Wawu ada jadma dadua, luh ring muani katurunang, mewasta Clika Mogeng Suksma Clika Mogeng Jati. Pada tan karep Sang Kakung lawan Sang Wadon.

Irika kasilurang kamane Bhagawan Dwi sareng I Buyatni Murti nyilurang, kamane putih ring Sang Lanang, kamane abang ring Sang Wadon, mara pada mekarsa Sang Lanang ring Sang Wadon, ditu Sang Atma ngalih tongos, wawu karsa pada karsa, Sang Atma di tengah karsane magenah, wawu liat pada liat Sang Atma di tengah liate magenah, wawu sabda pada sabda Sang Atma di tengah sabdane magenah, wawu matemu rasa pada rasa Sang Atma di tengah rasane magenah, matemu bayu pada bayu Sang Atma di tengah bayune magenah, di ngantiang pesu kamane Sang Atma Mola arane, di pesu Kaman I Bapa ne Sang kama Dresta arane, di pesu Kaman Sang Ibune Sang Kama Dresti arane, di awor Atmane Sang Ajumulang arane, sampun meadukan kama putih kama bange Sang Buru Maket arane, rawuh Sang Hyang Nilakanta mastu, nulia kentel ika kadi taluh Sang Hyang Antiga Jati arane, rawuh watek Dewatane sami, malih rawuh Sang Hyang Seleng, Sang Hyang Meleng kepastu antuk Sang Hyang Suksmantara wisesa dadi kama makekalih, kama putih muah kama abang mearan Kama Jaya Kama Ratih, katunggalang dadi abesik, masuk ring Sang Antiga Jati dadi bayu premana, muah

dadi rasa, bayu dadi Atma panunggun urip. Sang Hyang Seleng metu saking telenging atin I Bapane, dadi Atma ngaran I Pita tukuping jiwa, meraga Wong Khara sungsang. Sang Hyang Meleng metu saking telenging atin Sang Ibu, dadi Atma mearan I Kirit Marga, meraga Wong Khara ngadeg. Ika dadi Wong Khara ruwa bineda, ika dadi marga yati, muah marga urip, ika dadi pretiwi muah akasa, ika ngawe pati muah urip, ngawe tangi muah aturu, Sang Hyang Atma Roro, I Pitatukuping jiwa muah I Kirit Marga meraga bayu premana, dadi abesik ring Sang Hyang Antiga Jati.

Malih matur Sang Sura Brata muang Sang Satya Kreti, “ singgih ratu peranda, di sampune matunggalan Sang Kama Jaya Kama Ratih ring Sang Antiga Jati, sapunapi malih dados ipun?” Sumahur Sang Resi, sapuniki cening, di sampune dadi abesik Sang Hyang Seleng Sang Hyang Meleng, dadi Kama Jaya Kama Ratih nyusup ring Sang Antiga Jati, rawuh Sang Hyang Murcaya, Sang Hyang Taya, Sang Hyang Alengis, Sang Raja Tangi, Sang Hyang Murtining Luwih, watek Nawa Sanga, Sapta Resi, Panca Resi, Sang Hyang Tiga Wisesa, karekayang manusa Sang Antiga Jati, bawu mareka manusa, mewasta Sang Pretama Jati, irika watek Dewatane asung, Hyang Akasa aweh sirah, Sang Hyang Jiningkasa aweh rambut, Sang Hyang Surya Candra aweh mata kiwa tengen, Sang Hyang Baruna aweh irung, Sag HYang Marga Laya aweh song cunguh,Sang Hyang Kuwera aweh kuping kiwa tengen, Sang Hyang Marga Swara aweh song kuping, Sang Hyang Yama aweh cangkem, Sang Hyang Marga Maya aweh song cangkem, Hyang Prigi Manik aweh gigi, Sang Hyang Rijasi aweh isit, Sang Hyang Makep Tanmakep aweh lambe, Sang Hyang Madu Lata aweh ilat, Sang Hyang Cita Rasa aweh rasaning ilat, Sang Hyang Upe aweh pipi, Sang Hyang Ngalenging aweh jagut, Sang Hyang Anta Tunggal aweh bawong, Sang Hyang Watu Gumulung aweh batun salak, Sang Hyang Taya aweh tangan, Sag Hyang Khala Rotok aweh jariji, Sang Hyang Panca Naka aweh kuku, Sang Hyang Tyang batis, Sang Hyang Bunyang aweh usehan muang pungsed, Sang Hyang Angentala aweh ulun ati. Malih Sang Hyang Panca Resi asung, Sang Korsika aweh kulit, Hyang Garga aweh daging, Hyang Metri aweh otot, Hyang Kurusya aweh balung, Hyang Pretanjala aweh sumsum.

Malih matur Sang Subrata miwah Sang Satya Kreti, “ Singgih paduka Sang Resi, sampun sapunika,wenten panyrita malih?” Sumawur Sag Resi, uduh nanak sira kalih, wenten malih panyritan ipun! Ida Sang Hyang watek Nawa Sanga asung, Hyang Iswara aweh papusuh, Hyang Mahesora aweh peparu, Hyang Brahma aweh ati, Hyang Ludra aweh usus, Hyang Maha Dewa aweh ungsilan, Hyang Sengkara aweh limpa, Hyang Wisnu aweh ampru, Hyang Sambu aweh ineban, Hyang Siwa aweh tumpuking ati, ngaran bayu, bayu ngaran atma, ne meraga Sang Hyang Urip. Yan kawite dadi manusa kamane, nanging ada nyarengin, Dewa Khala Atma nyarengin, Atmane dadi patunggalan sami, Dewa Khala tunggal maring Atma, Atmane manyusup ring manusa, tatiga ngawakin manusane idup, suba ada Dewa Khala Atma ngawakin, ada nyama nia patpat nyarengin, ari – ari, yeh nyom, metu sakig I Bapa, getih luwu, metu saking I

Meme, punika ari – arine, yeh nyome, getihe, luwune, sami kadaden tanah, sarin pangan kinume, dadi kama, Kaman I Meme Kaman I Bapa, kamane dadi manusa, bayun kamane dadi Khala, rasan kamane dadi Atma, sarin kamane dadi Dewa, krana hana KandaPat Bhuta muah Kanda Pat Dewa. Bayun kamane dadi Khala, Rasan kamane dadi Atma, sarin kamane dadi Dewa, ika ngempu manusane, duking urip tekaning pati, ika ngawe ala, muah ngawe hayu, ngawe pati ngawe urip, ngawe papa ngawe suarga, suarga idup surga mati, ngawe buwung ngawe payu, ika apang tangar tingkahe dadi manusa, apan sang manusa dadi umah, umah papa, umah suarga, Apan margan patine marganine ring ala hayu, masusupan dadi bikas manusa, ada papa suargane genah nia, pati urip tunggal genah nia.

Malih Sang Putra kalih matur, “pakulun paduka Sang Resi, mahawinane wenten Kanda Pat Bhuta, Kanda Pat Dewa,sapunapi malih?” ngandika Ida Sang Resi, inggih sapuniki cening!. Kandan ipun: Ari – arine. Bayune dadi anta preta, rasan ari – arine dadi pirata, sarinia dadi Dewa, Ida Dewa Puseh, mulih ring papusuh, dadi Anggapati, suarga nia Sang Hyang Iswara, magenah ring Idep. Malih getihe dadi Khala, rasania dadi Atma, sarinia dadi Dewa Dalem, mulih ring ati, dadi Banaspati, suarga nira Bhetara Brahma, genah nia ring manah. Malih yeh nyome, dadi Dengen, rasania dadi Paraatma, sarinia dadi Dewa Cungkub, mulih ring ungsilan, dadi I Mrajapati , suarga nira Bhetara Maha Dewa, dadi sabda. Malih luwune dadi Bhuta, rasania dadi sogaatma, sarinia dadi Dewa Pasaren, mulih ring ampru, dadi Banaspati Raja, suarga nira Bhetara Wisnu, dadi ambek. Ika Kanda Pat Bhuta, muah Kanda Pat Dewa aran nia. Sabdan Bhuta Ih Ah Eh Uh. Sabdan Dewa iki Ing Ang Eng Ung. Sabdan atma iki Nging Ngang Ngeng Ngung. Anging sami kawah, sami suargan dadinia.

Malih nembah matur Sang Putra kalih. “ Iggih Ratu Sang Resi, asapunapi awinan sinangguh kawah?, sinangguh suargan?, eling kawula pukulun” sumawur Sang Yogi Swara, uduh ranak ingsun, sapuniki parikandan ipun: Dasa bayu dadi Daseng driya, Panca Bayu dadi Pancendriya, ika tunggal dadi tatiga, Bayu Sabda Idep. Malih nunggal dados kekalih, ne kekalih nunggal dados asiki, yan sampun puput punika ilang letuhe,suarga juga kepanggih.

Malih matur Sang Putra kalih, “ Singgih Ratu Sang Resi, sapunapi panunggalan punika?, sumawur Sang Resi Brata, sapuniki cening: ne mewasta Dasa Bayu matemahan dadi Dasaksara, iki aksara nia: Sang Bang Tang Ang Ing Nang Mang Sing Wang Yang. Malih nemewasta Pancaksara iki sastra nia: Sang Bang Tang Ang Ing.malih nemewasta Triaksara, iki suarania: Ang Ung Mag. Malih ne mewasta ruwa bineda puniki: Ang Ah. Malih Eka aksara puniki: Wong. Puput panunggalan ipun. Malih wenten Tri aksara, nora hana suara nia: , O , O , yan nunggal puniki, . amunika pangresep puput Sang Siwa Resi, anging arang jadmane manggih, yan tan panugrahan Sang Hyang Suksma, punika hawinan Sang mahyuning tutur dharma kapanditan, mabresih sekala,

apan Sang manusa meraga sekala, malih meraga niskala, sekalane bresih, niskalane pag bresih, mapan meaduk niskalane teken sekalane.

Nembah matur Sang Putra kalih, “singgih ratu Sang Resi, warahana dena terang kawula weruh, sumawur Sang Resi Brata, uduh cening, sapuniki kawite: saluiring pangan kinum I Meme ne, muah pangan kinum I Bapa ne, ika sarining pangan kinum dadi kama, malih kamane dadi manusa, manusane mawak letuh, apan kadaden kama, kadaden getih, ikaletuh sekalane, kulit balung sumsum ika kawah arane, ane mewasta suargan, bayu sabda idep, rasa menget, ikakabeh suargan. Malih isin punika, Khala Atma Dewa, keadukang ring kamane, Khala Atma Dewa bareng letuh, kerana ada neraka sekala neraka niskala, nyusup ring manusa, ane mewasta neraka sekala: peceng, perot, mati ala, gondong, kutung, kiting, udug, buduh, ayan. Ne madan neraka niskala : Kenehe sakit ati, bayu sabda idep, rasa menget, sami neraka krana ada mati megantung, nebek iba, ngamuk, punika dewa khala ia ring raga sami neraka, numadi ngaba bering, melaggendah, punika krana ada predana idup, predana mati. Malih ne mewasta predana idup, bawu lekad, matelah – telah, kepus pungsed, matelu bulanan, mekalah – kalahan, makala hiyas makala hening, madudus mawinten agung, punika ngawe bresih sekala idup, Malih predanane mati, nutugang make telun, matelah – telah solas dina, ngaben matuwun, nyekah mukur, punika gawene, sama lawan matelah – telah kepus pungsed samania, yan Sang Resi nora weruh mawak Sang Hyag Atma, brana telah Sang Hyang Atma kesasar, yan Sang Resi weruh ngawas Atmanira, malih weruh angarad Sang Hyang Atma, tur molih panugrahan saking brata tapa weruh angarad nyaman Sang mati, pilih suarga Hyang Atma, krana Sang Resi tan surud ngamong brata tapa, ngalih panugerahan, punika ne sadyayang pisan. Malih yan mekalah – kalahan miwah nubah nelu bulanin, ngempugin metik jambot, aja ngumandel balian magenta, tan sida karya, apa krana keto, apan Sang wawalen tan weruh ring kanda, kandane dumadi jadma, ika krana tan sida karya.

Malih matur Sag Subrata muah Sri Satyakreti, “inggih ratu Sang Resi, sapunapi maka patut predanane? Mangda tan salah para, yan mrastika rare, nelu bulanin miwah ngotonin?. Sapuniki cening kraman ipu, malih Sag weruh ring tattwan raga, wenang ngantebang bantene, apa krana keto, apan Dewa, Pitara, Khala, punika sareng katiga ngraganin Sang rare, matemahan bayu sabda idep, khala dewa dadi bayu, dewane dadi idep, atmane dadi sabda, punika ne tatelu nora belas – belas, ilang abesik ilang makejang, teka abesik teka makejang, Sang atma ajak dumadi dadi manusa, atmane dadi urip, dewa khalane dadi bikas, krana dadua bikase, ala teken yu, mati idup, pules ngendusin, dharma badohos, belog ririh. Gunane masih dadua,gunan khalane dadi leak, dadi gering. Gunan Dewane dadi balian, dadi ubad, yan prasteka manusa, yan tan weruh ngarad khala, ngarad dewa, ngarad atma, nora sida gawene, banten telah kutang di margane, sama nia, yadin Sang Brahmana Resi, muah Sang Bujangga Resi, yan tan samangkana, tan sida gawe kojarania, Resi corah ngaran nia.

Matur Sang putra kalih,”tembe tan keneng raja pinulah kaula umatur, sapunapi awinan sinagguh corah, apan Sang Resi ngregep Weda? Sapuniki cening tingkahe corah, dudu wedania angge ngawedain, dudu sapa nia angge nganteb, dudu pengastawa nia angge ngarad, ika mekrana corah, asing corah ngaran dusta, apan Sang Resi kabeh meraga patirtan, wenang ngadu dharma pitutur, mangulah brata tapa, mangregep dharma yukti, triwikrama, catur buja.

Malih matur Sang Putra, “ Tabe pukulun kawula matur, nuwun terang kawula, ring rasaning tri wikrama, muah rasaning catur buja” Sumawur Ida Sang Resi, sapuniki cening! Patute Sang Resi, ne mewasta tri wikrama, mangregep Sang Hyang Tiga Wisesa, Sang Hyang Jagat Wisesa, metu ring bungkahing bayu, Sang Hyang Antara Wisesa metu ring bungkahing sabda, Sang Hyang Adnyana Wisesa metu ring bungkahing idep, iki pengastwa ring Sang Hyang Jagat Wisesa: Wong Ang Sang Hyang Jagat Wisesa metu sira ring bayu alungguh ta sira ring bungkahing adnyana sandi, Wong Wong Sri jagat guru paduka yanamah swaha, poma. Iki pengastawa ri Sang Hyang Antara Wisesa: Wong Wong Sang Hyang Antara Wisesa yanamah swaha, metuha sira alungguh tengahing adnyana sandi, Wong Wong Sri Jagat guru paduka yanamah swaha, poma. Iki pengastawa ne ring Sang Hyang Adnyana Wisesa: Wong Mang Sang Hyang Adnyana Wisesa yanamah swaha, alungguha sira ring tungtunging adnyana sandi, Wong Wong Sri Jagat guru paduka yanamah swaha, Poma. Sapunika pengastawane ring Sang Hyang Tiga Wisesa, anging pada gelah sisyan.

Malih matur Sang Putra, “ Inggih ratu sapunapi awinan masisyan? Kene cening! Apan mulania tatelu bikas nia, tatelu jele, tatelu kawah, tatelu suargan.

Malih matur Sang Putra, “Iggih ratu Sang Resi, awinan kerawos tatiga kawite, tatelu bikase, sapunapi katerangan ipun? Sumawur Sang Resi Yajnya,yan kawite tatelu, bayu sabda idep, ika tatelu, ne madan kawah tatelu, alan bayune kawah, nga. alan sabdane kawah, nga. Alan idepe kawah, nga. Rahayun bayune suargan, nga. Ika ngaran, 3 ,ring bayu sabda idep. tunggal papa suargan Sang Manusa. Dadi ala muah hayu, saking irika marga nia metu, dadi guna ala, muah dadi guna hayu. Muah gunane ala: anesti, nawat aneluh, angleyak, ane awaking ibuwes, magenah ring gumi badol, di pesambungan basang wayahe, ring basang ngudane, di pegantungan kakondone, sareng Sang Anta Preta, Sang Khala, Sang Bhuta, Sang Dengen. Ne awakanga teken ni buwes irangdeng jirah, Icalonarang, I ratna mangali, I larung, I kekek, I guyar, I gadebong basah, I gandil, I misa wadana,I lendi, I katepeng reges, punika sami sisyan I rangdane, guna nia patpat paturu luh, madan I ji, I melok, I dedes, I lenyad, paican Bhatari Durgha, magenah di geber layahe di beten, I Dewa Dalem Mraja Pati di bongkol layahe, tomadan Setra Gandha Mayu. Malih yan ngaggen pangawisesan, Sangkep ke Gunung Agung, I Manusa Sakti regep, nunggal ring Sang Atmane Sang manon khalane, Angga Pati, Mraja Pati, Banas Pati, Banas Pati Raja, malih purwanggana, suptanggana, jayeng rana, punika

sami ajak, malih mantra kaputusane itung, yan Dalem Sumeru Dalem Ketu, Dalem Sinunggal, I Dewa Dalem ajak, tunggalang ring Sang Manon ring I Manusa Sakti, saluiring putusan tunggalang ring Sang Manon ring Manusa Sakti.

Yan Sang Resi, I Kulisah nunggal rig Sang Manon, ring Manusa Sakti, nyamane ajak mabresih, mebrata, mayasa ajak kawukin, medahar meambuh ajak, ane regep awaking, Siwa, Sada Siwa, Prama Siwa. Sang Hyang Dharma Siwa, punika regep, anging nyamane sami bresihin, Dewa Khala Atma ri negep bresihin, aja ngandel mabresih aji banten, malih mabresih aji toyan Sang Brahmana, muah toyan Sengguhu, Toyan Dewa. Kulit Daging Otot Balung Sumsum punika balih akna, Bayu Sabda Idep Rasa menget, ika nora akna, kunang pabresihan punika brata yasa, yoga semadi. Apa krana keto, sekalane mabresih sekala, nisakalne mabresih niskala, ne mewasta niskala Dewa Khala Atma. Punika durung bresih.

Malih nembah matur Sang Putra, “Inggih ratu sapunapi reh sampun bratane wai anggen? Uh cening Putran igsun, sapuniki margan punika, yan Sang Resi weruh amarga kasuniatan, weruh ngastawa ngarad Khala, ngastawa ngarad Dewa, malih weruh ngarad Atma, tur weruh ngatonang atmanira, ika ngaran Sang Resi putus, yadyan Brahmana, Bhujangga, Satriya, Arya, kasamen, yan sampun katon denia Sang Hyang Atma, wenang sekama – kama manah nia, ika ngaran wong menak, sida kang gawe, poma.

Malih nembah Sang Putra sraya matur, “ Inggih paduka Sang Resi, kadi tityang wadon sapunapi patut tityange? Keni sampun anggen tityang sisip? Sumawur Sang Resi Anggastyaprana, duh cening anak ingsun, sama Sang wenang Sang Kakung lawan Sang Wadon, apan tunggal kawite nguni. Kama pada kama, bayu pada bayu, rasa pada rasa, anging apang priksa ngamong manah, lamun kurang priksa teken raga, ala kepanggih, lamun priksa ngamong manah rahayu kepanggih, apan matunggalan sekalane lawan niskalane, ala sekalane, nisakalne bareng ala, ayu sekalane, niskalane bareng ayu, suarga sekalane, niskalane bareng suarga, apan sekalane dadi wadah niskala.

Nembah matur Sang Putra, “Ratu paduka nunas terang kawula. Kulit daging otot balung sumsum ragan ceninge niskala, Atmane, Mengete, Uripe, punika saling kretiyang, awana ada kreti idup, luih kreti mati, apang pada nemu rahayu, ala ayune sami di ragan ceninge. Ane ala sakeng Khala wetunia, ika mewasta kawah, ngaba neraka. Ane ayu sakeng ayu wetunia, ika ngawe suarga, ika ngaran suargan, ane sekala, Sang manusa ngaba, ane niskala Sang Atma ngaba, krana ada papa idup, muah papa mati, ne madan papa idup, ane keni gering agung, wusan mekrama dewa. Ne madan papa mati, ne mati salah pati, dadi kumandang, tektek lintah, iras iris poh, punika puput warah ring cening.

Malih matur Sang Putra, “ Inggih Ratu kadi tityang sapunapi patute? Kene cening, sami sakolahin, apan sami di ragane, Dewa, Khala Atma, sami diragane, Atmane dadi panunggalan, cening dadi umahne, dadi guna dadua, gunan leyak ring gunan balian, krana dadua lakune, ala ring ayu, pules atangi, papa suarga, sugih tiwas, pati ring urip, belog ririh, darma bedohos, olas bangga, tresna gedeg, mula metimpal Khalane ring Dewane, krana anake maturan antuk nasi warna, pangredanan Khala, ika pang cening uning, sami sedeng astawa, pengastawan atma, yan nora sapunika, nora ada nampi bantene, prabeya kutang tengah margane saminia.

Malih cenig sastrane ring ragan ceninge wilang, ane magenah di lontare orta puika nora wenten guna nia, kewala orta punika sastrane magenah rig raga punika dadi guna, dadi sidhi sakti, wetuning bayu sabda idep, luir nia iki: yan kawite sarin pangan kinume, ampas nia dadi bacin, dadi enceh, sarin nia dadi kama, saking Sang Lanang kama jaya, nga, saking Sang Wadon kama Ratih, nga. Ika matemu ring jeroning weteng Sang Ibu, magenah ring gedong kreti, ring telenging adi pati, punika kewastanin antuk Bhatara, dadi manusa, ada ludira yeh nyom, ari – ari luwu nyarengin, bayu nia dadi atma, sari nia dadi dewa, krana ada Kanda Pat Bhuta, Kanda Pat Dewa, Malih Kanda Sapta Atma, muah Nawa Sanga, malih Dasaksara, dadi tutur wasana kamoksan. Luir nia Dasaksara ring raga, kadi iki:

Sang : Ring Papusuh. Gunung Maha Meru, nga, Wetu nia Siwa, Hyang Iswara, Dedari nia Hyang Indra.

Bang : Ring Ati genah nia, Gunung Samudra, Taman nia Bagendra, buron nia Wilmana, Dewa nia Sang Hyang Yama, Hyang Brahma, Senjata nia Danda, Dedari nia Dewi Saraswati.

Tang : Ring Ungsilan, Gunung nia Gunung Lawu, Taman nia Botrawi, Buron nia Naga, Dedari nia Dewi Talukih, Dewa nia Hyang Maha Dewa, Wetu nia Pandita, terus ring lelata, Senjata nia Naga Pasah.

Ang : Ring Ampru, Gunung Tebang, nga, Taman nia Winduratna, Buron nia Garuda, Dedari nia Dewi Rantanaji, Dewa nia Hyang Wisnu, Terus ring tingal, Wetu nia Prabu.

Ing : Ring pegantunganing Ati genah nia. Gunung nia Arga Manik, nga, Dewa nia Siwa Guru, Dedari nia Sri Wirocana,

Nang : Rig Peparu, Gunung nia gunung Matoya, Taman nia Ksari, nga, Sang Hyang Mahesora, Dedari nia Sri Maha Dewi, Terus rig irung, Wetu nia Brahmana.

Mang : Rig usus agug genah nia, Dewa nia Hyang Ludra, Dedari nia Paduka Swari, Terus ring Lidah, Wetu nia Prama Resi.

Sing : Ring Limpa genah nia, Dewa nia Hyang Sengkara, Dedari nia Sri Maha Dewi, Terus ring irung.

Wang : Rig Ineban, Linggih Hyang Sambu, Gunung Ambala, nga, Taman nia .Nadari, Buron nia Warak, Dedari Gagar Mayang, Terus ring Rambut, Wetu nia Bhujagga.

Yang : Ring Madya, ring pengantunganing papusuh, Gunung Andabhawana, nga, Taman Pedadaran, nga, Buron nia Winateya, nga, Linggih Bhatara Siwa, Panunggalan nia Dedari kabeh, ring pengantunganig papusuh, pangantugan ati genah nia Sang Hyang Urip,

IKI TUTUR PASATONE MUNGGUH RING RAGA:

Luir nia sami:

Bedawang Nala : Ring telapakn suku kalih genah nia.

Sangga Wilutan : Ring tundun batis kalih genah nia.

Sang Lembu Surang Gana : Ring matan batis tengen genah nia.

Sang Asu Gemplong : Ring Wood batis genah nia, bulun awakne dadi alang – alang aji, sabdane KOTOS dadi api ategal.

Sang Asu Yaksa : Ring karna metu,

Ang Yama Raja : Ring cangkem metu.

Kayu Curiga : Bulu matane di baduwur.

Sungga Kadutan : Bulu matane di beten.

Segara endut : Letuh kenehe.

Segara Api : Brahman munyine.

Batu macepak : Song bungute.

Titi Gonggang : Layahe.

Tukad Gede : Pehese.

Ujan Gede : Yeh matane.

Geni Lem : Geden rambute.

Ika kabeh bisa mencana Sang Atma, awinan Sang weruh ring tutur priksa ring dewek. Apan saking dewek dadi ala ayu, krana tangar jadmane makeneh dadi pandita.

Malih nembah matur Sang Putra, “Inggih Ratu, sapunapi patut tangar Sang Resi? Sapuniki cening, tingkah jadmane sami meraga sekala abagi, meraga niskala abagi,tur ngelah meme bapa sekala, ngelah nyama niskala, ngelah awak sekala, ngelah awak niskala, punika pada baang mreta, pada baang kreti, pada baang genah. Malih memene sekala, ane ngalekadang deweke, Ibu Bapane niskala, ane nurunang atmane,

mewasta Bapa Nareswara Ibu Nareswari, nyamane niskala, Purwanggana, Isuptanggana, Isuranggana, Ijayenggana. Malih pangempune: Babu Lembana, Babu Sugian, Babu Abra, Babu Kakere, Malih ane ajaka lekad bareng, ari –arine dadi Anta Preta, Getihe dadi Khala, Yeh Nyome dadi Dengen, Luwune dadi Bhuta, punika ne patut ajak mabresih, makala hiyas makala hening, punika ne mawak niskala, Gawenin sahi sekala, yan nora weruh ngarad Bhuta, ngarad Dewa, pada tan sida gawe, yadin Sang Brahmana, malih Sang Bhujangga anggen, kado gawene, aja ngumandel balian magenta, yen tan weruh ring weda pengastawa, muah weda pengastawan banten, malih wedan ngelis, punika sami wenang Sang Resi weruh, apan Sang Resi maka patirtan sekala niskala.

Matur Sang Putra, Ong Sri ya we namonamah swaha, “Inggih Ratu awinan tan wenang kumandel sapunapi? Apan Sang Wewalen malilen Sang Numadi, Sapuniki cening, Sang Wewalen nora weruh ngastawa pakalan Sang Rare, malih pada Dewan Sang Rare, malih Atman Sang Rare, malih ne ngeraganin Sang Rare, malih ne nurunang jadmane sami, punika tan kena pengastawa, iki pengastawan nia: Ih kaki Siwa Gotra Nini Siwa Gotra sira angatag kabeh, pada Dewane Sang Rare kula, Luir nia Hyang Jagat Wisesa, Sang Hyang Kemit Tuwuh, Sang Hyang Patunggun urip, Muah Sang Hyang Mretyu Jiwa, maka jiwane I rare kula, satekanig pekalan ipun, muah atman ipun kabeh, manyusuping ragane si bajang bayi, pulung kabeh ring ragan ipun, manusa nira pakulun, agaturang sarining banten pamredanan ipun, apan sampun tutug tigang sasih, pakulun manusa angaturin Paduka Bhatara, anyumput sari amukti sari, amesep sari amukti sari, sarining banten suci sukla, saha rerasmen nia genep, lelawuh miwah paider, kunang katur ring pekalan ipun, punjung pangkonan, nasi warna, enak sira pada mukti, yan sira pada puput amukti sarinig banten, manusa nira amilaku tuwuh amilaku urip, amilaku tirta pabresihan pangening, panglukatan panyuda malan, pangilanganing reged satekaning panumadin ipun, muah Sang Manumadi, uli Lanang uli Wadon, tekaning pangempun ipun, mangden sida bresih, dening tirta Bhatara, poma ratu poma, pada poma, pona, poma, poma. Srana yeh anyar mewadah payuk, bunga warna 11, samsam bija kuning, nunas di banten patelu bulane, ring sanggah kamulan, ring sanggah pangempune nunas. Malih penganteb baten Otonan: Mantra. Wong Mang Ong Mang, pukulun Kaki Among Nini Among, sira angamong atma bayuning manusa pukulun ingsun angaturang banten patatebasan pahotonan ipun si anu, penek agung penek alit, sata winangun urip, maiwak segara, ulam rumbah gile, jejatah calon, rerempah, waduk liklik bawi, sasak mentah daging semali, gerah gatel gerih kapiting gering agung, cicipan taluh sawung linembaran, panjungjung tunjung bang tunjung pinge, kalih suci sorohan prangkat idengan, pageh tuwuh pageh urip, banten taman hening jati kasundaran, peras panyeneng kajenengang dening Siwa Sada Siwa Perama Siwa, kasaksinin dening Sang Hyang Trio Dasa Saksi, manusa nira pakulun angaturaken sarining banten, pamilakun ipun si anu, sredah paduka Bhatara kahaturan mukti sari anyumput sari, yan sampun puput paduka Bhatara amukti sari

anyumput sari, manusa agung pamilakun ipun, amilaku rahayu, satekaning Dewa Khala Atma turunan ipun, sami amanggih rahayu, pakulun Kaki Lulut Nini Lulut, becik kana rajeg tuwuh ipun si anu, sampun pinegat kekayonan wandira waringin, panuduhan widya dara widya dari, amepeking tuwuh watu, pukulun Begawan Kali Watu, amepeking tuwuh si anu, sungsung baru keneng raja pinulah, tan keneng sungsung baru, apan wenang wus nora, wus nora, 3. Pukulun Bhatara Mreta Buana,Bhatara Prajapati, muah I Bhuta Mretyu jiwa, wangsula akena atma juwitane si anu,apan sampun tinebusaning manusa ring madya pada, ulih akena atma juwitan ipun, angrangsuk ring raga kurungan ipun, anusup ring kulit ring daging otot balung sumsum, bilang buku bilang sendi, terus tekeng bayu sabda idep, kasusupan sarining urip, poma, 3. Nunas toya di bantene wadah payuk kedas, samsam bunga warna 11, bija kunig, mabyakawon, kawukin ajak sehananing Dewa Khala nia, muah atma nia arad kawukin, natab banten mahoton matoya sami ajak, matepung tawar mahelis arad apang bareng, yan tan keto nora sida gawene, ika krana aja ngumandel nengnengan, apan tan weruh ngarad Dewa Atma Sang numadi, Iki Pengastawan Bhuta: mantra, Ih Kaki Siwa Gutra Nini Siwa Gotri, sira angatag sanak ingsun kabeh, Anta Preta, Bhuta, Khala, Dengen, muah Anggapati, Mrajapati, Banaspati, Banaspati Raja, malih Babu Lembana, Babu Sugian, Babu Kakere, muah I Jelahir, I Makair, I Mokair, I Selabir, abresih konkon ametu kabeh, mabresih mabiya kawon, malukat mapahening hening, sareng kelawan tang hulun de rahayu. poma, 3. Iki sabdane ngajakin, yan meambuh genahang ring kulit sirahe, yan medahar ring bongkol layahe genahang, yan kayeh rig kulit genahang.

Malih matur Sang Putra kalih, “Inggih Ratu Sang Resi, punika Sang Manusa reh Dewa Khala ngawakin, sapunapi antuk mangda sami rahayu” uduh cening anak ingsun, pagawen Sag Hyang Tuduh, Dewa Khala Atma, katunggalang dadi asiki, suba dadi abesik kasusupang di kamane, kamane dadi manusa, punika bareng krana sai – sai. yan ilang, ilang makejang. yan teka, teka makejang. Dewa Khala Atma, dadi bayu sabda idep. manusane dadi umah. umah Dewa, umah Atma, umah Khala. Krana anake mrasteka manusa, tatelu ngarepang pengastawa, pengastawan Bhuta, pengastawa Atma, pengastawan Dewa, yan nora sapunika, brana kutang tengah rurunge samania. eda cening nora ngugu daging tutur paican kawi, duk bawu nurunang manusa, yan Khala Dewa, tan hana manusa, lacur Dewa Khalane yan manusa tanpa atma. Mati kang manusa, yan Dewa Khala tanpa Atma. Kesasar kang Dewa, muah Khala, Sang Hyang kawah mala kreta. Ika mekrana Sang Manusa tangar. jawat ring Meme Bapane sekala, lamun nora patut tingkahe, ya dadi musuh, yadin nyamane niskala, yan patut bahan nasarin, ya bisa tulung. Ika awinan Sang Resi ngulah brata tapa.Medana manah rahayu, nirmala, ngalih panugrahan.

Malih matur Sang Putra, “Inggih Ratu Sang Resi” sapunapi palikraman Sang nangun brata? bawu ngawit manahe? Sumawur Sang Resi Anggastya Prana, inggih cening sapuniki, ngaturang piuning ring Dewa Kamulan, mangde Ida nyaksinin, malih Kaki Siwa Gotra Nini Siwa Gotri, ika piuningin, apan satingkah Sang manusa, Ida nyaksinin. Ida nyaksinin sami, sareng Sang Hyang Tiga Wisesa, sehanan Khalane ajak mebrata, sehanan Dewane ajak mebrata, sehanan Atmane ajak mebrata, mahelis matepung tawar ajak sami, medahar ajak kawukin. Yan gunan baliane anggen, deweke madan I Kulisah, yan guna leyake anggen, deweke I Bues arane. Yan gunan pangwisesane anggen, awake I Manusa Sakti arane. Yan kuranta bolong anggen, awake Sang Manon arane.

Malih matur Ida I Putra, “Inggih Ratu Sang Resi” sapunapi pangregepe rikala ngastawa? sapuniki cening,

Nini Siwa Gotra bungkahing rasa nirmala genah nia, Nini Patni Musti sareng.

Kaki Siwa Gotra, malih Bhagawan Duwi, tungtunging rasa niramala genah nia.

Nini Bhagawan Penyarikan, Tungtunging sabda Sang Hyang Lumanglang.

Nini Bhagawan Saksi, bungkahing ati.

Kaki Bhagawan Saksi, tungtunging ati.

Sang Hyang Trio Dasa Saksi, ring Bayu Sabda Idep.

Sang Hyang Jagat Wisesa, uriping bayu genah nia.

Sang Hyang Antara Wisesa, Uriping sabda genah nia.

Sang Hyang Adnyana Wisesa, uriping manah terus ring Adnyana nirmala.

Sang Hyang Hening tungtunging idep.

Atmane meraga Sang Hyang Tunggal ngebakti, ngaturang saluiring gawene, angaturang banten, tampi ikang Dewa, Ida sami rawuh tur nampi, yan tan sapunika nora ada nampi, mebagian – bagian gawene.

Malih matur Sang Putra, “Inggih Yang Ratu yan sapunika, mekadi bawos I Ratu, sami wenten penganteb saluiring banten? sumawur Sang Resi Anggastya Prana, uduh cening, yan turut kadi linging sastra gamane, sami wenten sapan ipun,

Matur Sang Putra, “Inggih Ratu yan janmane alaki rabi, wenten pali kraman ipun? sumawur Sang Resi, inggih wenten cening, yan tan wenten sapa, kadi patemun kidang menjangan I mausa, ane sampun terang merabi ana sapa, mangde suka pada suka, yan tan suka Sang Istri, sampunang mari kosa, ngawe ujar ala, kaget Sang Istri sebet ring dewek, ika anggen rabi ika patemune ala, atut dadi ngelah pyanak, pyanake ngaba gering malagendah. tur kual pangpang ring Meme Bapa, nyakitin Meme Bapa wekasan. yan lacur kereng ngelabuhang, keto ala nia, krana sapa rahayu. Malih yan ngidam Sang Rabi, hana sapa nia malih, pangurip kama pangurip manik, ika sapa nia, malih yan sampun gede belingan nia, malih ada sapa nia, panglukatan beling, pabresihan, pangurip bayu, panuntun atma, panuntun bayu, krana weda atma raksa, malih yan nia

nyakit, ada sapa malih, panyeseh, pangentak rare. Di lekad rarene ajaka patpat, yeh nyom, getih, ari – ari, luwu, lalima maring rare, malih pengenem tai langlang, punika ngawenang reged Sang Rare, punika bresihin sami, ika gawenang banten, tunasang ring Dewa, idihang rig manusa, apang ya bresih, ane nganteb bantene, apang priksa ngarad khalan ari – arine khalan getihe, khalan luwu, khalane yeh nyom, khalan pelem, khalan tain langlang, ika apang bresih sami.

Malih dimaran nyane lekad, mategesin Sang Rare, adayang pejati ring Ibu Pretiwi, iki sapan pejatine : Mantra, Ih atangian Ibu Pretiwi, I Rare Bajang metu ring jero weteng, tiba maring sira, sareng sanak nia patpat, lalima kelawan rare bajang, tampi den rahayu, pada hayu, wehana kajenengan tuwuh, kajenengan urip, satekaning sanak ipun kabeh, poma, 3. Malih sambodana ring akasa: Mantra, Wong bhur buah yanama swaha, pukulun paduka Sang Hyang Akasa, I Bajang Rare wuwus metu sakeng jero weteng, sadulur lawan ari – arin ipun, lugrahana kaula ingiyas ending iris pering, agawe maka bresih ipun I Bajang Rare, yan sampun palas ipun ring ari – arin nia, satekaning luwun ipun, paduka Bhatara masawitang ring Ibu Pretiwi, asungana rahayu aweta hurip, poma, 3. Malih pasabondana ring Pretiwi: Mantra, Ih Budaya yanamah swaha, atangya IBu Pretiwi , anak ira akarya luang, metu Ibu Pretiwi, anak ira amendem ari – arine I Bajang Rare, tampi den rahayu, apan mulane sakeng sira, mangkin mulih ring sira, tampi den rahayu, awehana pageh tuwuh pageh urip, urip waras lunas lanus, tan ketaman dening gering, saking asih nira Sang Hyang, poma, 3.

Sapunika parigana Sang manusa yan Sang weruh ring tata kramaning kemanusan.

Malih matur Sang Putra, “Inggih Ratu yan sampun kepus nabin ipun? wenten predana malih? sumawur Sang Resi, wenten patut palikrama, tunasang pabresihan ring I Dewa Kamulan, daksina banten asoroh, nasi warna sapupute, tur menampiang Sang Rare, tunasang toya, nasi warna di jalane manak asoroh, tur ngutang reget bajang colong, malih di luwune metanem, banten nasi warna, punika bresihin, tunasang ring Dewa, idihang ring usada yeh pabresihan, yeh pebajangan, sami bresihin genahe manak, Meme Bapa nia anake cerik, bajang colonge, mahelis mabresih matepung tawar malukat mapehening – hening. Anging Khalan Ari – arine, Khalan luwu, Khalan yeh nyom, sami bresihin, sampun nia bresih tunggalang ring I Bajang Colong, kutang ring marga, anging pasawitang ring I Bhuta Bragenjong, iki sapa nia: Mantra, Ih kaki Siwa Gotra Nini Siwa Gotra, sira angatag I Bhuta Bragenjong, I Bodo, I Cili Gendruk, I Cili Mareka, Ingsun angutang Bajang Colonge I Bajang Rare, tampi dena becik, aja aweh tulah mangeringin I Rare Bajang, anak ira Bhatara Guru, balikana wehana rasya rahayu kajenengan urip, urip waras dhirga yusa hening, poma, 3.

Yan nigang sasihin, kadi iki sapa nia. Mantra: Wong Ang Ung Mang, pukulun Kaki Empu, sira pun sakabeh tekeng Dewa Atmanipun, uli lanang uli wadon, akona metu

saking anggane si anu, ingsun aweh tirta pabresihan panglukatan panugrahan Sang Hyang Suksma, poma metu sira kabeh, poma, 3.

Pangregep Dewa nia genahang ring sirah, khala nia ring cangkem, atmania ring rahi nia genahang, raris toyanin, maketis, mainem, masugi, puput. Malih ya apasang tebus, iki sapa nia, Mantra: Ih Pakulun paduka nira Sang Hyang Suntagi Manik, Sang Hyang Kemit Tuwuh, Sang Hyang Patunggun Urip, sira angamong atma bayune si anu, maka satus akutus satus sawelas, satekaning Dewa Khala nia sami, asuk akna ring bayu sabda idep, muah anusup ring rasa menget angen – angen, ring adnyana sandi, Pukulun Kaki Among Nini Among, among dena becik, bayu atmaipun si anu, yan hana panyengkala rawuh, sira anulakang sehananing dhurga kabeh, uling lanang wadon anatab banten predana pahotonan ipun si anu, sakareng abresih asisirih sira kabeh, masegawu matepung tawar, mahelis degdeg, magawe degdeg atma bayun ipun, amilakuna tirta pabresihan, panglukatan ring Guru Siwa, muah ring I Dewa Batur Kamulan, bakti ring I Dewa Puseh Dalem Segara, sami paduka Bhatara asung tirta pabresihan, panglukatan panyuda malan, magawe bresihning reged di sarira,katiban tirta wedan Bhatara, bugkah kedas ilang sebel kandeling sarira, poma sira kabeh pada poma, poma, 3.

Iki pangincep ring raga. pasucian ring raga, pinaka kaputusan. Iki mantra nia.

Iki mantra masugi: Wong waktra parisudamam swaha.

Iki matra mandus: Wong Parama Gangga mreta yanamah swaha.

Iki mantran meambuh: Wog Kesa mretamam swaha.

Iki mantran masisig: Wog Induh tekita kamung Hyang Sang Hyang Saraswati sangkaning hati huta, kita sangkaning hati huta, andeleng tungtung tanga, hatining janma prawatwi kabeh, Wog sidhi pala nia.

Iki mantran parawupan, mesrana toya ring sibuh cemeng, inum merawup sugiang pada ping 3. Mantra: Wog Sri Dewa manurun Pandita wak sariranku, mangguh aku ring buang putih, Dang Hyag Sakiran dening kumkum, mrebuk arum gandane awaku, karungu dening kadehaning ulun, wastu wong tumon ring awak sariranku, teka asih, teka asih.

Iki pangeger, srana pucuk bang sekar akna, Mantra:

Wong sekar Wari bang tumbuh nyane duwuring pratiwine akasa, makenyah aku dadi bintang masiluman aku dadi bulan matan ai, teka lengleng sula hatine wong kabeh aningalin awak sariranku, kedep sidhi mandi mantranku.

Raris sekarang!

Iki pengater – ater. Srana cempaka kuning sekar salimpetakna. Mantra:

Wung Sang Hyang Cening sukunku kembang anwaribang, kuning kapoma jenar temen, irungu sabda swaranku angidung, bentar buyar kepangater – ater, kerut atine wong kabeh, tumingalin awak sariranku, teka welas asih atin wong kabeh, tumingalin awak sariranku, teka sidhi kedep

mandi mantranku,

Iki mantrane lenga tanusan, lisah akna.Mantra:

Wong lenganku lenga kama jaya, ingapunang dedes tingalun jawa, kapoki teka ring bali, manyakupa nyampunu atine wong kabeh, teka welas asih ring awak sariranku, tek egawan Anggastyaprana